Skróp

Oftar en ekki keppa ráðherrar um að vera viðstaddir þegar ríkisstjórnin telur rétt að monta sig af einhverju. Nýverið héldu ráðherrar blaðamannafund til að monta sig af því sem stjórnin ætlar að gera í húsnæðismálum fyrir ungafólkið og fyrir fátæka fólkið.  Það voru sögð mörg (vel valin) orð og vonir vaktar; þeir, ráðherrarnir ætla að leysa vandann.

Að leysa húsnæðisvanda fólks er til vinsælda fallið. Hlýtur að vera það. Og þess vegna vakti það furðu að á fundinum voru aðeins ráðherrar frá tveimur af þremur stjórnarflokkum. Enginn frá Sjálfstæðisflokki; meira að segja ekki Jón Gunnarsson, sveitarstjórnarráðherra, sem nýverið þandi sig mikið vegna húsnæðisvandans og þóttist hafa lausn á hverjum fingri. En hann mætti ekki í sviðsljósið. Merkilegt.

Og nú eru liðnir nokkrir dagar og hvergi er sagt frá því hvers vegna enginn sjálfstæðismaður mætti. Enginn af öllum þeim fréttamiðlum sem ég lít á daglega hefur útskýrt fjarveru þeirra. Vegna þessa gengur sú skýring staflaust um bæinn að ástæðan sé sú að Sjálfstæðisflokkurinn sé andvígur þeim tillögum sem kynntar voru. Þeir ætli að hindra framgang þeirra þegar þar að kemur. Og niðurlægja þar með samstarfsflokkana. Og mennina. Undarlegt; og líka það að enginn fjölmiðill hefur spurt ráðherra Sjálfstæðisflokksins af hverju þeir mættu ekki í sviðsljósið.