Úlfar Þormóðsson 20/10/2017

Skattpíning

Þeir eru allmargir sem trúa Mogganum. Ennþá. Nokkrir trúa hugmyndafræðingi hans og Sjálfstæðisflokksins, Birni Bjarnasyni. Allir þessir trúa lágmiðlum á borð við Andríki. Þeir sem hér hafa verið tilteknir syngja einum rómi um glæpsamlegar áætlanir Vg um skattahækkanir komist vinstri stjórn, undir foræsti Katrínar Jakobsdóttur, til valda eftir kosningar. Þær skattahækkanir muni valda verðbólgu, atvinnuleysi og almennri eymd í landinu. Segja þeir. Slúðrararnir.

Fyrir þá, sem vilja átta sig á því hvað satt og rétt er í málunum, verður hér birtur status sem Katrín Jakobsdóttir, formaður VG hefur birt á Facebook og fjallar um fyrirhugaða “skattpíningu” Vg:

“Þessar kosningar snúast um það að við blásum til sóknar á Íslandi og byggjum upp samfélagið til framtíðar. Það er hægt að fjármagna þessa sókn með ábyrgum og skynsömum hætti án þess að hækka skatta á almennt launafólk.

Við getum aukið arðgreiðslur úr ríkisbönkum um tugi milljarða á komandi kjörtímabili og nýtt þær til að greiða niður skuldir svo nýta megi afgang ríkissjóðs í uppbygginguna.

Við getum aukið skattaeftirlit til að draga úr skattsvikum og skattaundanskotum sem áætlað er að nemi tugum milljarða á ári hverju.

Við getum hækkað afkomutengd veiðigjöld á útgerðina og tryggt tekjur fyrir afnot af öðrum auðlindum.

Við getum gert skattkerfið réttlátara með því að taka upp þrepaskiptan fjármagnstekjuskatt til að tryggja að þau sem lifa á fjármagnstekjum leggi sitt af mörkum eins og venjulegt launafólk.

Við getum tekið upp hóflegan auðlegðarskatt á hreina eign yfir 200 milljónum. Við getum tekið upp hóflegan hátekjuskatt á tekjur yfir 25 milljónir á ári.

Það er hægt að fjármagna þá nauðsynlegu uppbyggingu samfélagsins upp á 30-40 milljarða sem fólkið í landinu kallar eftir án þess að hækka skatta á almennt launafólk.”

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,459