Úlfar Þormóðsson 02/10/2017

Sjálfsuppvakningur

Sigmundur Davíð (SDG) hóf endurkomu sína í stjórnmálin með nokkrum látum í vikunni sem leið. Hann stal senunni, yfirtók allt sviðið. Hann var aðal karlinn í öllum fjölmiðlum og á mannamótum alla vikuna. Hann var mættur til þess að ræða framtíðina. Og stóru málin, sagði hann og brosti íbygginn, og margir héldu að þarna væri kominn framsækinn baráttumaður, SDG endurborinn. Og það laðaðist að honum fólk af mörgu sauðahúsi.


Og svo leið vikan. Þá sótti hann í gamla farið. Sjálfur. Af eigin hvötum. Birti blaðagrein. Ekki um framtíðina, heldur um tandurhreina fortíð sína og sætan sigur á íslenskum skattayfirvöldum. Grein sem var full af hálfmælgi, sjálfhælni og yfirlæti. Þokuslæðingur lagðist yfir Wintris að nýju. Til hvers var Wintris stofnað? Af hverju seldi hann sinn helming í félaginu fyrir 1 dollar – einn dollar-? Var það ekki meira virði ? Af hverju fór salan fram þann dag sem raunin var? Var það vegna skattamála? Af hverju var ekki fært bókhald fyrir Wintris frá því að það var stofnað og í fjögur eða fimm ár, og ekki fyrr en SDG hafði hrökklast úr forsætisráðuneytinu? Af hverju kærði hann og kærði til þess að fá að færa eignir Wintris til skatts í íslenskri mynt þó að félagið hefði allan rekstur á aflandseyjum og engan rekstur hérlendis? Var það til þess að hafa 52,3 miljónir króna út úr ríkissjóði vegna gengistaps?

Uppvakningur er látinn einstaklingur sem vakinn hefur verið upp með göldrum af einhverjum lifanda. Við eigum margar sögur af þeim. En enga sögu hef ég rekist á þar sem hinn dauði vekur sjálfan sig. Nú hefur SDG gert það. Fyrstur allra. Vakti sig upp af pólitískum dauða. Hann er sjálfsuppvakningur. Og. Hann bætti um betu og kvað sig aftur niður. Sjálfur.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,472