Úlfar Þormóðsson 23/07/2017

Siglt er hátt, en lágt er lotið.

Tveir helstu hugsuðir Sjálfstæðisflokksins, Björn Bjarnason, formaður Varðbergs, og Styrmir Gunnarsson, fyrrum ritstjóri flokksmálgagnsins eru, hvor í sínu bóli, búnir að átta sig á hvað á að verða aðal mál flokksins í borgarstjórnarkosningunum í vor. Björn hefur skrifað nokkrar greinar um málið. Styrmir eina. Hún birtist á sunnudaginn 23. júlí. Þetta er úr henni, feita letrið líka:

“Nú vill svo vel til að sveitarstjórnakosningar verða næsta vor.

Starf borgarstjórnarflokks Sjálfstæðisflokksins á því kjörtímabili, sem er að líða bendir til þess að flokkinn vanti baráttumál á vettvangi borgarstjórnar.

Skólpmálið mikla er beint tilefni til fyrir Sjálfstæðisflokkinn að taka upp umræður um víðtækari breytingar á borgarkerfinu.

Það verður spennandi að fylgjast með því, hvort flokkurinn sjálfur, einstakir borgarfulltrúar eða nýir frambjóðendur í prófkjöri vegna borgarstjórnarkosninga taka þetta mál upp á þeim forsendum.”

 

Eitt sinn taldi Sjálfstæðisflokkurinn að Guðlaugur Þór Þórðarson mundi vinna borgina fyrir flokkinn. Það brást sem vonlegt var. Þá var talið víst að Björn Bjarnason mundi vinna hana. Hann var boðinn fram. Hún vannst ekki og þótti engum skrýtið. Og nú á að láta reyna á málefnin, skólpið, skólpmálið mikla. Það er hásigling framundan hjá Sjálfstæðisflokknum..

Fyrir mörgum áratugum orti Baldur heitinn Baldvinsson á Ófeigsstöðum í Köldukinn eftirfarandi vísu af öðru tilefni en hugsjónasmíðum þeirra Björns og Styrmis. En eins og oft vill verða með vel gerðan kveðskap á hann oftar við en af einu tilefni.

Siglt er hátt, en lágt er lotið.

Lífið eins og kveikur brennur.

Nú er Ísland niðurbrotið

nægtafullt svo út af rennur.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,487