trusted online casino malaysia
Úlfar Þormóðsson 17/10/2016

Sérstaða

Staða Framsóknarflokksins í stjórnmálum er einstök nú um stundir. Hún sætir slíkum fádæmum að það er taklin frétt, meira að segja myndskreytt forsíðufrétt í Morgunblaðinu, að formaður flokksins hafi talað við þingmann flokksins. Þeir „Hafa átt trúnaðarsamtöl eftir fáleika,“ svo vitnað sé til fyrirsagnar á forsíðu Moggans. „Sigurður Ingi Jóhannsson, forsætisráðherra og formaður Framsóknarflokksins, og Sigmundur Davíð Gunnlaugsson hafa ræðst við …“

Framsókn

Það er sum sé fréttnæmt þegar formaður Framsóknarflokksins talar við fyrrverandi formann flokksins sem jafnframt er alþingismaður og efsti maður á lista flokksins í því kjördæmi sem flokkurinn hefur verið hvað öflugastur undangengna áratugi.

Hitt væri líka frétt, og aldeilis ekki minni, ef skýrt væri frá því hvað þeir töluðu um, formaðurinn og frambjóðandinn. Mogginn spurði að því og fékk þetta svar: „Hvað var sagt er trúnaðarmál. Ég ætla ekki að gefa upp hvað okkur fór í millum,“ hefur blaðið eftir Sigurður formanni sem í gær kynnti stefnuskrá flokks síns.

Og stefnuskráin, já. Hvað með hana? Voru þar engin tíðindi? Mogginn sótti blaðamannafund þar sem kosningastefnuskrá flokks þeirra núverandi og fyrrverandi forsætisráðherra var kynnt. Sú frétt er birt á blaðsíðu 4. Að mati blaðsins eru þar fólgin minni tíðindi en þau að forystumenn Framsóknarflokksins tali saman. Og það merkilega er, eða kannski það grátlega; fréttmat blaðamanna Moggans er rétt.

Latest posts by Úlfar Þormóðsson (see all)
Flokkun : Efst á baugi
1,578