Úlfar Þormóðsson 14/06/2017

Óvit

Menn verða fyrir árásum annarra manna; þær lita alla mannkynssöguna.  Frá því var skýrt í hádegisfréttum (14.06.´17) að vestur í Bandaríkjunum var skotið á þingmann og einhverja fleiri á íþróttaleikvangi. Þó mun öryggisgæsla hvergi vera meiri og öflugri en þar vestra. En. Samt sem áður. Slíkar fréttir berast víðar að og hrikalegri margar. Og maður myrtur í Mosfellsbæ á dögunum. Það er ekki hættulaust að lifa.

Ríkislögreglustjóri fær mun fleiri fréttir af voðaverkum en almenningur. Út frá þeim upplýsingum sem honum berast erlendis frá og því sem gerist hér innan lands metur hann hver hætta sé á voðaverkum hér. Hann getur tekið einhliða ákvörðun um að auka vopnaburð lögreglunnar; þarf hvorki að fá samþykki hjá dómsmálaráðherra né þjóðaröryggisráði. „Sérsveitin er á ábyrgð ríkislögreglustjóra. Og það er hans að vega og meta og taka ákvarðanir um það með hvaða hætti sérsveitin starfar,“ segir hann á vefritinu Stundin. Og nú hefur hann ákveðið að hafa vopnaða sérsveitarmenn innan um hátíðagesti á 17. júní og jafnframt á öðrum fjölmennum mannamótum. Og þá væntanlega líka á þeim almennu mótmælafundum sem framundan kunna að vera vegna aðgerða ríkisstjórnarinnar eða aðgerðarleysi.

Með ákvörðun sinni er ríkislögreglustjóri ekki einungis að storka öfgamönnum; hann er líka að heiðra þá, sýna þeim að ofbeldi þeirra hefur borðið árangur, þeim hafi teklist að breyta þjóðfélagsgerðinni hér og hræða yfirvöldin.

Til eru ljóð, sem lifna og deyja í senn, og lítil börn, sem aldrei verða menn, orti Davíð Stefánsson forðum. Ríkislögreglustjóri er ennþá í bófahasar bernskunnar. Ég treysti hvorki hættumati hans né dómgreind. Ákvörðun hans ber merki um óvit, hræðslu og þröngsýni.

 

Það er sannarlega  ekki hættulaust að lifa. En flest okkar teljum það áhættunnar virði fjarri byssukjöftum.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,438