Ritstjóri Herðubreiðar 18/12/2016

Minningarnar eru í litla putta

Kynning (óforskömmuð auglýsing)

Steina Elena fer snemma í rúmið þessa dagana, líklegast vegna þess að jólasveinarnir eru lagðir af stað til mannabyggða ofan úr helli sínum. Því hélt pabbi að Steina væri sofnuð þegar hún kom fram og var mjög hugsi á svipinn. Hún nam staðar fyrir framan pabba og horfði dágóða stund á hann. Loksins sagði hún: – Pabbi, veistu hvað?gudni-mar-og-steina

– Nei, svaraði pabbi.

– Það eru vandræði.

Pabbi horfði á Steinu og var alveg viss um að það væru vandræði. Hún var mjög áhyggjufull á svipinn.

– Pabbi. Stúfur kemur í nótt.

– Já, líklega gerir hann það.

– Hann er alveg óskaplega lítill.

– Já, trúlega.

Steina horfði stórum augum á pabba. Sagði svo: – Pabbi, það eru tröppur út í bílskúr. Setjum þær við gluggann minn.

Pabbi og Steina fóru inn í bílskúrinn og náðu í tröppuna. Settu hana svo fyrir framan gluggann á Steinuherbergi. Nú kæmist Stúfur örugglega í gluggakistuna þar sem einn skór beið eftir einhverju fallegu.

– Pabbi, eigum við ekki að gleðja hann svolítið og setja jólaskraut á tröppuna?

– Jú, það skulum við gera.

Svo náðu þau í aðventukrans og komu honum fyrir á tröppunni. Allir jólasveinar yrðu nú ánægðir með slíkar móttökur.

– Mamma, mamma! hrópaði Steina. – Við erum búin að gera allt klárt fyrir Stúf! Nú geturðu tekið mynd af tröppunum.

Mamma lofaði að gera það í fyrramálið þegar aftur yrði bjart og Stúfur örugglega farinn.

Steina rölti inn í herbergið sitt ánægð með þessi endalok. Kom svo aftur fram og sagði: – Nú set ég þetta í litla puttann minn!

– Hvað meinarðu? spurði pabbi.

– Jú, lófinn minn er lófatölva og minningarnar eru í litla putta.

– Viltu þá ekki sofa með vettlinga? spurði pabbi.

Steina leit með óræðum svip á foreldra sína og sagði loks: – Góða nótt.

———-

forsidaKafli úr bókinni Það er rafmagnslaust hjá selunum eftir Guðna Má Henningsson og Steinu Elenu Guðnadóttir. Útgefandi er Herðubreið.

Bókin fæst í helstu verslunum, en einnig á forlagsverði (kr. 3.900) með pöntun í herdubreid@herdubreid.is.

Meðal umsagna:

Þessi bók er yndislega skemmtileg.“ – Óskar Magnússon

„Algjör yndislestur. Mæli með þessari bók fyrir stóra sem smáa.“ – Lay Low

„Frábært samspil feðgina um lífið og tilveruna. Hér fara Steina litla og Guðni á kostum.“ – Bjartmar Guðlaugsson

„Þessi bók kallaði fram bæði hlátur og saltkorn í augun.“ – Karl Th. Birgisson

0,571