Úlfar Þormóðsson 16/11/2018

Margföld tvöföldun

Ég var að ryksuga. Í dag. Sveim mér þá. Útvarpið mallaði frammi í eldhúsi. Svo byrjuðu fjögurfréttirnar í Ríkisútvarpinu og ég heyrði þulinn segja: “Fasteignaverð á höfuðborgarsvæðinu hefur tvöfaldast á innan við 20 árum.” Við svo búið varð skammhlaup í rafmagni, það gnast í ryksugunni og ég heyrði ekki í útvarpinu. Þar sem ég er með snert af hljóðvillu var ég nokkuð vissum að mér hefði misheyrst.


Svo leið dagurinn. Ég beið spenntur eftir sexfréttunum en missti af þeim. Hins vegar sá ég sjónvarpsfréttirnar með öðru auganu klukkan sjö og heyrði aftur þá fullyrðingu að fasteignaverð hefði tvöfaldast síðan um aldamót. Ég efaðist enn og aftur því að vinkona mín keypti sér hundrað fermetra íbúð í miðbænum rétt fyrir aldamótin og borgaði fyrir hana átta og hálfa miljón króna. Henni bauðst að selja hana á miðju þessu sumri fyrir tæpar 70 miljónir.

Þar sem þetta er hressileg tvöföldun fór ég að efast um eyrun á mér og leitaði fréttina uppi á ruv.is. Þar var hún undir þessari fyrirsögn:

Fasteignaverð tvöfaldaðist á 20 árum

Upphaf fréttarinnar var svo þetta:

“Fasteignaverð á höfuðborgarsvæðinu hefur tvöfaldast á innan við 20 árum og er nú sjö prósentum hærra en um mitt ár 2007, árið fyrir hrun. Þá hefur verðmunur á milli hverfa minnkað. Þetta kemur fram í skýrslu Capacent um stöðuna á fasteignamarkaði fyrir Reykjavíkurborg.”

Þar sem ég gat ekki lengur skýlt mér á bak við hljóðvillu, varð ég að taka mark á augunum í mér. Ég sá þetta með þeim. Það stóð þarna svart og blátt á ljósgráum grunni. Klára niðurstaða, unnin fyrir borgina. Af sjálfu Capacent. Heimsfrægri endurskoðunarskrifstofu. Einni af þeim  sem gaf íslensku bönkunum hæstu einkunn fyrir áreiðanleika og afbragðs afkomu alveg þar til þeir fóru á hausinn. Úr því að þeir segja þetta hlýtur það að vera svona, örugglega: Íbúðaverð í Reykjavík hefur hækkað um helming síðan um aldamót. Annað eru bara ómarktækar sjónhverfingar raunveruleikans og engin ástæða til þess að biðja “innri endurskoðun” borgarinnar að endurskoða niðurstöðu endurskoðunarskrifstofunnar. En það má samt leggja fram eina spurningu i tilefni dagsins, dags íslenskrar tungu:

Er til eittvað eitt orð yfir margfalda tvöföldun?

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,500