Mannvitsbrekkur

Kosningar nálgast. Þá láta spakvitringarnir í sér heyra. Einn er Óli Björn Kárason, þingmaður Sjálfstæðisflokksins. Hann birti grein í Morgunblaðinu í gær. Hún fjallaði um – átti að fjalla um – fjármál Reykjavíkurborgar. Í geininni eru margir tölustafir og mikið reiknað. Nafnleysingi (Óli Björn, Björn Bjarnason, Davíð Oddsson, Eyþór Arnalds, eigandi blaðsins eða einhver annar óframfærinn) birti í dag samantekt, valda hápunkta, úr grein Óla Björns í Staksteinum sama blaðs og því dreift óumbeðið í hús. Þar er þessi þrungna málsgrein um skuldaaukningu Reykjavíkurborgar:

Þetta gerir hækkun skulda um rúmar 22 miljónir króna á dag og eina miljón króna á hverja fjölskyldu.

Rétt er að undirstrika að Óli Björn er enginn aukvisi í stærðfræði. Hann er formaður í efnahags- og viðskiptanefnd alþingis. Hæstvirtur.

Önnur mannvitbrekka lét ljós sitt skína og birtir grein í Fréttablaðinu í dag, 03.05.´18. Það er frambjóðandi til embættis borgarstjóra, tónlistamaður, viðskiptajöfur, bílstjóri, Eyþór Arnalds. Hann skrifar um borgarmál. Og ekki af léttúð. Lesið þetta:

Það er alltaf varasamt að leyfa fyrstu byggingar. Það er alltaf hætta á að svo komi fleiri á eftir.

Hann þarf ekki að örvænta hann Eyþór hvernig sem kosningarnar fara. Það er þörf fyrir háspeki. Víða. Jafnvel hjá Félagi atvinnurekenda.