Úlfar Þormóðsson 16/05/2017

Lög á stundargróðamenn

Ég hef enn ekki skilið þá hugmynd sjávarútvegsráðherra að það beri að endurskoða auðlindaskatt á útgerðina vegna þess að HB-Grandi ætlar að hætta botnfiskvinnslu á Akranesi; hef ekki vit til þess að koma auga á tengingu þarna á milli; að auðlindaskattur geti komið í veg fyrir að útgerðir með fiskverkun færi vinnslu frá einum stað á annan.

Þorgerður Katrín Gunnarsdóttir

Það ætti ekki að vefjast fyrir nokkrum manni, að fiskveiðar og vinnsla er undirstöðuatvinnugrein. Hitt deila menn um hverjir eigi að fá að stunda veiðarnar, hvað og hvernig greiða eigi fyrir veiðileyfi, og hvort útgerðarmenn eigi að fá að kaupa fiskinn af sjálfum sér og verka hann þar sem þeim sýnist. Flest allir, aðrir en talsmenn útgerðarinnar og hún sjálf, eru ósáttir við kerfið eins og það er orðið af illri meðferð og afbökun gróðapunga og gáfumanna.

Það sem er að gerast á Akranesi hefur gerst víða um land síðan núverandi kvótakerfi var tekið upp og afbakað á ýmsan hátt fyrir útgerðir með fiskvinnslu. Stórútgerðir setja af stað fiskvinnslu í sjávarplássum og áður en langt um líður hafa þær komið höndum yfir mesta allan kvóta sem þar er. Þá er ekki eftir meiru að slægjast samkvæmt gróðavon viðskiptafræðanna, og útgerðin flytur verkunina burt úr plássunum. Starfsfólkið á um tvennt að velja; að flytja með verkuninni og leigja hjá útgerðinni í nýju plássi eða sitja eftir atvinnulaust í kvótalausu sjávarþorpi.

Þessu þarf að breyta. Strax. Áður en stjórnkerfið allt er stokkað upp, sem verður að gera fyrr en síðar. Það er unnt að gera þetta. Til þess þarf aðeins örlítinn kjark.  Og kannski lögfræðilegar tæknibrellur.

Málið snýst um að setja það í lög, eða reglugerð, eða semja þingsályktun um að þegar útgerð færir sig úr stað skuli hún skilja eftir hjá sveitarstjórninni þann kvóta sem hún hefur fengið aðgang að á staðnum. Þetta skal gert án þess að útgerðin/fiskvinnslan fái greiðslu fyrir skilakvótann enda hefur hún haft hagnað af honum meðan hún var í plássinu.

Það liggur í augum uppi að ef kvótinn yrði kyrr í plássinu væri léttara en ella fyrir sjávarbyggð að vinna sig út úr þeim vanda sem brotthlaup stundargróðamanna veldur. Tilskipun af þessari sort yrði til hagsbóta fyrir mannlífið í landinu.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,433