trusted online casino malaysia
Úlfar Þormóðsson 07/11/2017

Kollhnís

Morgunblaðið leggur nú allt kapp á að gera lítið úr stjórnmálahæfileikum Katrínar Jakobsdóttur. Í leiðara segir að innan þingflokks VG séu uppi efasemdir um að “formaðurinn, Katrín Jakobsdóttir, væri ekki sá alvöru stjórnmálamaður sem margir telja að hún sé.” Og Staksteinar taka eftir Styrmi Gunnarssyni að heimildir hermi “að efasemdir séu að vakna innan VG um verklag Katrínar formanns flokksins”. En þyngsta höggið, sönnunina fyrir vanhæfni Katrínar, telur Mogginn vera þegar hann leiða fram, hvorki meira né minna en sjálfan Atla Ingibjargar Gíslason, femínista og fyrrverandi þingmann Vg, til þess að skýra “grundvallarmistök” Katrínar. En fáir hafa meiri reynslu af því að gera mistök en Atli sem meðal annars rústaði fylgi Vg á Suðurlandi með aumkunarverðri þingsetu sinni 2009-´13. Hann er akkúrat maður sem á auðvelt með að koma auga á vanhæfni annarra. Og trúverðugur á mælikvarða Moggans.

***

Mogginn er skrýtin skepna. Og Framsókn líka. Annan nóvember síðast liðinn birtist þetta á mbl.is klukkan 18:04:

“Sig­urður Ingi Jó­hanns­son, formaður Fram­sókn­ar­flokks­ins, er bjart­sýnn á að stjórn­ar­mynd­un­ar­viðræður Vinstri grænna, Sam­fylk­ing­ar­inn­ar, Fram­sókn­ar og Pírata eigi eft­ir að ganga vel. Hann seg­ir meiri­hlut­ann vissu­lega tæp­an og seg­ir það áskor­un fyr­ir þá flokka sem standa að slíku stjórn­ar­sam­starfi …”

Í dag, tæpum fimm sólarhringum síðar, hefur Agnes Bragadóttir þetta eftir framsóknarmanni, sem hafði fengið sínar upplýsingar hjá formanni sínum:

„Svona stjórn var einfaldlega aldrei á vetur setjandi. Það varð að breikka hana. Þess vegna spurðist Sigurður Ingi Jóhannsson, formaður okkar, fyrir um það í stjórnarmyndunarhópnum fyrir helgi hvort áhugi væri fyrir því í hópnum að hafa samband við Sigmund Davíð Gunnlaugsson, formann Miðflokksins, og það kannað hvort flokkurinn vildi koma inn í viðræðurnar. Sú hugmynd Sigurðar Inga fékk hins vegar alls engan hljómgrunn í hópnum og var beinlínis hafnað, hafi ég skilið þetta rétt,“ sagði þingmaðurinn.

Sem sagt: Framsókn er, þrátt fyrir klofning, sjálfri sér lík, tvíeðla. Nú eru kosningar afstaðnar og hún getur sýnt annað andlit en fyrir þær. Hún er til í stjórn þótt hún hafi tæpan meirihluta og segir það fullum fetum. En hún er samt sem áður ekki til í hana af því að hún hefur tæpan meirihluta. Framsókn vill ekkert með Sigmund Davíð hafa en vill samt ekki setjast í stjórn nema hafa Sigmund Davíð með í henni. Það vilja ekki aðrir en framsóknarmenn og á því steytti.

Ergó: Sigurður Ingi og Lilja Alfreðsdóttir fóru í stjórnarmyndunarviðræður með það fyrir augum að friðmælast við Sigmund Davíð og sameina framsóknarmenn. En að þau munu ekki segja það opinberlega vegna þess að það hentar þeim ekki í valdataflinu.

Það væri þjóðþrif af því að báðum Framsóknarflokkunum yrði haldið frá stjórn landsins.  Það ætti þess vegna að stefna að því að mynda ríkisstjórn án beggja (allra) Framsóknarflokka. Það gæti auklið heilindi í pólitísku starfi.

Latest posts by Úlfar Þormóðsson (see all)
Flokkun : Efst á baugi
1,295