Úlfar Þormóðsson 18/12/2017

Gorgeir

Flugvirkjar eiga í launadeilum við Icelandair og eru komnir í verkfall þegar þetta er skrifað. Hvarvetna virðist deilunni stillt upp þannig að flugvirkjar séu að stefna heilli atvinnugrein í voða, ferðamennskunni; verkfallið sé þeim að kenna, ekki flugfélaginu.

Talsmaður (SA) Samtaka atvinnulífsins (vonarstjarna afturhaldssamasta arms Sjálfstæðisflokksins til flokksformanns) hefur talað mikið, hratt og hátt um yfirgang flugvirkjanna. Hann hefur greint frá því að þeir hafi farið sex sinnum í verkfall á þremur árum án þess að hann skýrði það einu orði hver ástæða þessara tíðu vinnustöðvana voru. Hann hefur líka talað um að þeir séu með 800 þúsund króna mánaðarlaun, en aldrei nefnt það að grunnlaunin eru 440 þúsund og 360 þúsundin yfirvinna, aukavinna fjarri einkalífi.

Björn Bjarnason fyrrverandi kirkjumálaráðherra og hugmyndafræðingur Sjálfstæðisflokksins hefur þetta eftir talsmanni SA í pistli sínum í dag 18.12.´17: “… við (hverjir sem það nú eru) erum með almenna launastefnu í landinu, og SA geta ekki hvikað frá henni, hvað þá gagnvart litlum stéttum sem reyna að taka landið í gíslingu með því að loka flugleiðum og lífæð landsins.“

Það er ljóst að kirkjumálaráðherrann fyrrverandi er sammála vonarstjörnunni um láta “litla stétt” ekki komast upp með það að leita réttar síns því að hann segir í lok pistilsins:

“Innan Icelandair hljóta menn að velta fyrir sér hvort unnt sé að tryggja stöðugleika í rekstri á annan hátt en að treysta á þjónustu flugvirkja hér á landi. Sé sá kostur ekki skoðaður í alvöru er ekki allt gert til að treysta framtíðarstöðu félagsins í harðnandi samkeppni.

Rétt er að undirstrika að tilvitnunin er tekin orðrétt úr pistli kirkjumálaráðherrans og því vert að þakka fyrir að herrann sá skuli aðeins vera hugmyndafræðingur en ekki ráðherra í ríkisstjórn Íslands.

Deila þessi leysist ekki fyrr en Icelandair dregur niður í hroka sínum “gagnvart litlum stéttum” og greiði þeim laun við hæfi.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,472