Frosti er frábær

Frosti Sigurjónsson er frábær.

Það urðu mér nokkur vonbrigði þegar hann tilkynnti hér um árið að hann væri hættur á þingi. Ég lýsti þeirri skoðun við hann og skammaði hann, og líklega varð hann svolítið hissa, því að við erum næstum alltaf ósammála.

Ég er nú samt aðdáandi hans. Hann er svo hugmyndaríkur.

Þessi eiginleiki Frosta kemur skýrast fram þegar hann talar um Evrópusambandið. Eins og aðrir framsóknarmenn seinni ára er hann ógurlega mikið á móti ESB og öllu sem það gerir.

En ólíkt mörgum öðrum var gaman að hlusta á og lesa það sem Frosti sagði. Vigdís Hauksdóttir og aðrir spunnu upp staðleysur og þvælu, vonandi af því að þau vissu ekki betur, en ekki Frosti. Hann fann alltaf efnisleg rök fyrir máli sínu. Það var ánægjuleg nýlunda.

En rökræðum við Frosta lauk alltaf á sama hátt: „Allt í lagi, Frosti minn, úr því að þú ert svona ósáttur við reglur um orkusparandi ljósaperur og ryksugur, sem við þurfum að taka upp í gegnum EES eins og allt hitt, hvað viltu gera í því? Viltu segja upp EES-samningnum?“

Svarið kom aldrei, af því að vitaskuld vill Frosti ekkert segja upp þeim samningi. Hann er skynsamari en svo. Hann hélt bara áfram að finna ESB allt til foráttu og gerði það betur en aðrir.

Miklu betur en til dæmis þeir sem kölluðu aðildarviðræður við ESB „aðlögunarviðræður“ og héldu því fram að vegna þeirra væru þegar orðnar stórkostlegar breytingar á stjórnkerfi Íslands. Þeir allra verst höldnu nota ennþá þetta orð.

Guðbjartur heitinn Hannesson tók sig til á alþingi veturinn 2013-2104 og spurði alla ráðherra í nýrri ríkisstjórn Sigmundar Davíðs Gunnlaugssonar hvaða lögum og reglugerðum á vegum ráðuneyta þeirra hefði verið breytt vegna aðildarviðræðna við ESB. Svörin komu eitt af öðru og voru öll eins: Engu hefur verið breytt eða þurft að breyta. Núll.

Samt talar sumt þráhyggjufólkið ennþá um „aðlögunina“, sem engin var. Staðreyndir skipta það engu.

Á sama hátt talaði sama fólk um að samningaviðræðurnar skiptu engu máli. Það væri ekki um neitt að semja. Engar undanþágur eða sérlausnir fengjust, allt væri fyrir löngu klappað í stein í sáttmálum ESB. Og það þrátt fyrir að nánast öll aðildarríki ESB hafi hingað til fengið undanþágur eða sérstakar reglur vegna brýnna hagsmuna sinna.

En ekki Frosti. Hann kynnti sér alltaf mál og fór aldrei vísvitandi rangt með staðreyndir eins og margir hinna.

Í ljósi alls þessa og miklu fleira var þess vegna sérstaklega ánægjulegt að sjá Frosta í kvöldfréttunum ræða um nýja orkulöggjöf Evrópusambandsins. Hann er auðvitað á móti henni – þó það nú væri.

Og hvernig vildi hann leysa málið? Hann var ekki spurður um uppsögn EES-samningsins, en hann hafði annað svar: „Við verðum greinilega að fá undanþágu frá þessari löggjöf.“

Undanþágu? Jess!  Æ lov jú.

Kæri Frosti: Segðu nú félögum þínum í Framsóknarflokknum að það sé hægt að fá alls konar undanþágur og sérreglur og að Evrópusambandið sé ekki níðinga- og samsærisskrímslið sem þau upplifa í martröðum sínum. Líka á daginn.

Það er erfitt, ég veit það, en þú veizt líka í hjarta þínu að það er satt. Og ef einhver getur þetta, þá er það þú.

Komdu því svo einhvern veginn í kring að þing verði rofið og þú verðir aftur alþingismaður.

Því að þú ert í alvörunni frábær.