Dónabónus

Það gæti verið skeytingarleysi mínu um að kenna, en ég hef hvergi séð rökstuðning fyrir því að þingmenn eigi að fá greiddan “jólabónus”. En þannig er það samt. Þeir fá bónus fyrir jólin. 181.050.- krónur, hundrað áttatíu og eittþúsund og fimmtíu krónur. Þetta orkar ekkert sérstaklega vel á mig. 

En sum sé.

Það er greiddur bónus til þingmanna. Allra. Líka til bardónanna sex, Sigmundar Davíðs, Gunnars Braga og hinna fjögurra fræknu.

Bónusfréttin vakti í mér illyrmið. Mér fannst að menn ættu ekki skilið að fá greitt fyrir að skrópa í vinnunni og fara út á bar til að klæmast og sulla í lágkúru sinni. Og mér finnst það enn. Svo fór Venus að daðra við karlinn í Tunglinu og ég fékk þessa prýðilegu hugmynd ofanúr himinhvolfinu:

Væri ekki ráð að þingmenn legðu fram ályktunartillögu sem fæli það í sér að skrifstofa Alþingis greiddi jólabónus allra þingmanna inn á reikning Öryrkjabandalagsins, Mæðrastyrksnefndar, Félags langveikra barna eða til einhvers félagsskapar þurfandi þjóðfélagsþegna. Þeir gætu gert þetta strax í dag, morgun eða hinn. Það mundi kannski hjálpa til við að hressa uppá ímynd þingsins.