Úlfar Þormóðsson 28/03/2018

Dauðateygjur

Einn mikilvirkasti ritstjóri íslenskra dagblaða, Jónas Kristjánsson skrifar pistil um dauða dagblaða síðustu aldar. Hann segir að vetur hafi sótt að þeim í byrjun þessarar aldar, þegar internetið þandist út og byrjaði að skafa til sín auglýsingar. Á sama tíma komu hingað gapuxar úr amerískum háskólum og hugðust nútímavæða bisnissinn upp í 20% gróða. Komið var upp eitruðu samstarfi ritstjórna og auglýsingadeilda, sálin hvarf úr dagblöðunum. Þeim fækkaði, sum lögðu niður útgáfudaga og urðu jafnvel vikublöð eða hurfu. Ný blöð supu dauðann úr skel og veraldargengi blaðamanna fór versnandi.

Í marga mánuði hefur Morgunblaðið tekið gjald fyrir fréttabirtingu. Það heitir á viðskiptamáli Samstarf. Það fer þannig fram, að blaðið lætur fréttamann skrifa grein um fyrirtæki og starfsemi þess, vöru og ágæti hennar. Í stað þess að birta skrifin sem auglýsingu eru þau prentuð sem frétt í Samstarfi við fyrirtækið sem um ræðir í skrifunum. Þetta eru að sjálfsögðu lofgreinar, afbrigði af falsfrétt. Samsetningurinn er svo birtur dag eftir dag og innheimt gjald fyrir birtinguna. Í dag er til dæmis að minnsta kosti sjötti dagurinn sem mbl.is birtir fallega uppsetta og myndskreytta “frétt” með yfirskriftinni Hvaðan koma páskaeggin? Hún er unnin í Samstarfi við Nóa Síríus, sem vill til að framleiðir páskaegg.

Sé rétt greining Jónasar Kristjánssonar, sem birt var hér að framan og ekki er ástæða til að efast um, er Morgunblaðið nú í dauðateygjunum. Þótt það sé áróðursblað íhaldsins, málgagn útgerðarauðvaldsins og ómerkilegt um marga hluti þá yrði eigi að síður missir af því vegna þess að þar vinna, auk leigupenna, margir hæfir blaðamenn og góðir skríbentar.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,449