Úlfar Þormóðsson 27/02/2018

Árstíðarleiðrétting

Það á að fara að semja um kaup og kjör í landinu. Ekki þó við tveggja til fimm miljónkróna forstjórana, heldur 250 þúsund króna fólkið. Atvinnurekendur hafa kallað saman söngkórinn sinn, sprotanum hefur verið lyft og tónninn sleginn. Frjálsi fjölmiðillinn Morgunblaðið kynnir texta lagsins í aðalfyrirsögn á forsíðu:

 

Hagkerfið tekið að kólna

Vonarprins valdsins í Sjálfstæðisflokknum, fram­kvæmda­stjóri Sam­taka at­vinnu­lífs­ins skrifar grein í frjálsa fjölmiðilinn í dag, 27.02.2018. Hún er ofin utan um blekkingar og byggð á mótsögnum. Í stuttum pistli er ekki hægt að fara ofan í þá handavinnu alla. Því verður hér einungis gefið lítið sýnishorn.

Prinsinn nefnir fjórar vísbendingar um kólnun í íslenska hagkerfinu og notar óhæf viðmið, prósentur gegn tölum. Og orðahnoð að auki. Þetta kallar hann fyrstu vísbendingu um vaxandi atvinnuleysi:

Þrátt fyr­ir nokk­urn hag­vöxt vex at­vinnu­leysi hægt og bít­andi. At­vinnu­leysi var 4% í janú­ar síðastliðnum og fjölgaði at­vinnu­laus­um um 1.600 manns milli mánaða, árstíðarleiðrétt. At­vinnu­leysi jókst um 29% frá mars­mánuði 2017.”

Ef reynt er að skilja þetta, svona “árstíðarleiðrétt”, er prinsinn að segja að atvinnuleysi hafi aukist. Sé það rétt þarf meira fé til þess að greiða atvinnuleysisbætur. Og þá leggst karlinn á kúna þvera; árum saman hefur það verið ein meginkrafa atvinnurekenda á hendur hins opinbera að það lækki tryggingagjald, en það inna launagreiðendur af hendi af greiddum vinnulaunum, þóknunum, reiknuðu endurgjaldi og öðrum tegundum greiðslna og launa eins og segir í 1. grein laga um tryggingagjald. Hluti gjaldsins rennur í atvinnuleysistryggingasjóð, sem aftur greiðir atvinnulausum laun.

Sum sé: Atvinnurekendur “vita” að atvinnuleysi fer vaxandi. Þeir vita líka að atvinnuleysisbætur eru greiddar úr sjóði, sem fær sitt ráðstöfunarfé af tryggingargjaldi sem þeir vilja að sé lækkað.

Skilaboð atvinnurekenda og Morgunblaðsins til verkalýðshreyfingarinnar við upphaf kjaraviðræðna eru því þessi, “árstíðarleiðrétt”: Ef launin hækka eykst atvinnuleysi og bætur lækka.

Þetta er því textinn sem samkór atvinnurekenda kemur til með að syngja við lagið Árstíðarleiðrétting eftir Halldór Benjamín Þorbergsson, framkvæmdastjóra samtaka atvinnulífsins.

En auðvitað vilja þeir vel.  Öllum. Þeir eru bara að vara okkur við. Af góðmennsku sinni, þekkingu og mannviti. Sjáið bara þessi orð forstjórans:

“Hag­kerfið er að breyta um takt. Takt­ur­inn hæg­ist og upp er runnið ár hagræðing­ar í ís­lensku at­vinnu­lífi. Efna­hags­leg­ar upp­sveifl­ur taka alltaf enda og spurn­ing­in er ein­ung­is hversu hörð lend­ing­in verður.”

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,426