Andríki

Það horfir aldeilis vel fyrir Sjálfstæðisflokknum í komandi borgarstjórnarkosningum. Það er ekki eingöngu vegna þess vaska hóps sem býður sig fram til þess að leiða lista flokksins. Þar kemur annað til og ekki síðra; hugmyndafræðingarnir. Þar er hún Gunna á nýju skónum svo eftir er tekið; tveir fallkandidatar úr borgarstjóraslag, Björn Bjarnason fyrrverandi þetta og hitt og formaður Varðbergs og Guðlaugur Þór Þórðarson núverandi þetta og hitt og fyrrverandi setu-dómsmálaráðherra.

Síðustu mánuði hefur hugmyndafræðingurinn Björn viljað að fráveitumál verði gerð að höfuðmáli kosninganna vegna þess að skolpveitan bilaði í sumar. Svo var gert við veituna og málið ónýttist. Nú telur hann að samgöngumálin, andstaða gegn Borgarlínunni, verði það mál sem færa muni Sjálfstæðisflokknum sigur í vor. Því til sannindamerkis vitnar hann í spekigrein hins þjóðkunna ökumanns Eyþórs Arnalds, sem keppir að því að leiða lista flokksins. Þar er viðrað slíkt ofurvit að ógjörningur er að vitna til þess. Þeim sem vilja fá botninn í er bent á heimasíðu Björns ( Bjorn.is 15.01.´18) .

Fyrrverandi setu-dómsmálaráðherra, hugmyndafræðingurinn Guðlaugur Þór Þórðarson leggur svo sem ekkert til, frekar en vænta mátti. En hann hefur sitthvað að segja eins og alkunna er og engu líkara en hann hafi í hótunum. Eftir því sem Eyjan.is hefur eftir honum úr Víglínu Stöðvar 2 stefnir í algjöra upplausn í borginni. Hann sagði ástandið svo slæmt, að til greina gæti komið, að hverfi borgarinnar lýstu yfir sjálfstæði, svo þau gætu tekist á við vandamálin:

„Ef menn fara ekki að skipta um kúrs og hér komi borgarstjórn sem sýnir meiri metnað og nái betri tökum á fjármálunum, veiti betri þjónustu og hætti að fullnýta hvern einasta skattstofn, þá mun bara koma alvöru umræða um sjálfstæði þessara hverfa.“

Eftir að hafa heyrt þetta spurði stjórnandinn spekinginn að sjálfsögðu hvort hann væri að segja að hverfin myndu lýsa sig sjálfstæð sveitarfélög. En auðvitað gat hugmyndafræðingurinn ekki svarað svo einfaldri spurningu heldur sagði: „Ef að til dæmis þessi hverfi væru sjálfstæð, þá myndu menn taka á þeim málum sem þarna kæmu upp.“ Merkilegt.

Fáránleikinn er skemmtilegur og væri óskandi að þessir tveir merku hugsuðir létu sem oftast í sér heyra fyrir kosningarnar svo að baráttan verði andrík og fjörug.