Úlfar Þormóðsson 18/03/2018

Alltaf kemur aftur næst

Sjálfstæðismenn reyna að dylja ótta sinn við yfirburðagetu Ríkisútvarpsins (Rúv) í fréttaflutningi og dagskrárgerð með því að krefjast þess að það verði tekið af auglýsingamarkaði svo að “frjálsir fjölmiðlar” (Mogginn, Útvarp Saga, Stöð 2, og fleiri miðlar í þeim dúr) fái þrifist. Með því að draga úr mætti Rúv vita þeir sem er, að þeir ættu auðveldari aðgang að fólki með áróður sinn og blekkingar, fólki sem mettað væri af vanskýrðum fréttum og stöðugu léttmeti í dagskrá hinna frjálsu.

Ég hef bent á það áður og bendi á það enn, að það væri óráð að taka Rúv út af auglýsingamarkaði. Auglýsingatekjur Rúv námu rúmlega 2 miljörðum á síðasta ári samkvæmt frétt í Kjarnanum í dag, 18. mars. Þessar miklu tekjur stafa af því að þeir sem þurfa að auglýsa vita sem er að Rúv er afar góður auglýsingamiðill. Þess vegna auglýsa þeir þar og það er ekki ósennilegt að það sé stjórnarskrárbrot að banna mönnum að auglýsa í einum tilteknum miðli.

Þótt ég myndi ekki sakna þess sérstaklega ef auglýsingar hyrfu úr útvarpi og sjónvarpi þá veit ég að þær eru ein lífæð Rúv. Ef það missti tvo miljarða af tekjum sínum yrði það annað hvort að draga saman reksurinn all verulega eða stóla á það, ár hvert, að alþingi veitti því nóg fé á fjárlögum til þess að halda uppi jafn öflugri starfsemi og það gerir nú, svo ekki sé talað um að gera enn betur en gert er. Það gæti ef til vill gerst með Vg í stjórn, að Rúv héldi efnahagslegum sjó, fengi jafnvel örlítið meira á næstu fjárlögum en þeim síðustu, en það mundi áreiðanlega ekki gerast næst þegar Sjálfstæðiflokkur myndar stjórn með Framsókn og Miðflokknum. Því alltaf kemur næst einhvern tíma aftur. Þá verður, og takið fullt mark á því, þá verður Rúv svelt, ef ekki í hel, þá inn að beini.

Því heiti ég á núverandi ríkisstjórn að láta það ekki gerast að Rúv verði tekið af auglýsingamarkaði. Ekki undir neinum kringumstæðum. Og ég ætla ekki að hafa það sem einhverja vonarglætu, ég ætla að leyfa mér að hafa það sem fullvissu í mínum huga, að stjórnin vinni ekki slíkt óhæfuverk.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,484