Úlfar Þormóðsson 10/06/2017

Ærum ekki óstöðugan

Í dag (10.06.´17), meðan á hinu svonefnda Litahlaupi stóð í Reykjavík, voru sérsveitarmenn ríkislögreglustjóra með byssur á stjákli við hlaupaleiðirnar. Vísir.is hefur það eftir ríkislögreglustjóra að um sé að “ræða ráðstöfun vegna nýlegra hryðjuverkaárása í London og á fleiri stöðum.”GPM_4348

Þá hefur Vísir.is það eftir ríkislögreglustjóra að þetta hafi verið gert til þess að tryggja “skjótt viðbragð sérsveitar til að vernda almenning sem kemur saman í miklu fjölmenni hérlendis.” Einnig er haft eftir sama foringja, “að vopnaðir sérsveitarmenn verði sýnilegir á uppákomum sem þessari á næstunni, svo sem á 17. júní.”

Á meðan hlaupinu stóð var mörgum götum lokað ,og voru stórir flutningabílar notaðir til þess, svo að önnur ökutæki kæmust ekki fram hjá. Þetta uppátæki rannsóknarlögreglustjóra er skýrt með áhættumati sem honum mun hafa borist frá Bretlandi.

Tiltæki þetta hefur sjálfsagt glatt hræddu karlana í Fljótshlíðinni og ef til vill er þetta gert að þeirra áeggjan. Mörgum mun hins vegar þykja uppátækið sorglegt og nöturlegt að fyrir dyrum standi að halda þjóðhátíð eftir rétta viku undir byssukjöftum. Og varla er það heldur tilhlökkunarefni hjá sérsveitarmönnum.

Líklega geta flestir verið sammála um að ofríkismann séu fremur lausgeðja. Yfirdrifinn varnarviðbúnaður hemur ekki skapofsa slíkra manna; það er hins vegar mun líklegra að hann espi þá til ódáða. Af þeim sökum ætti ríkislögreglustjóri að hafa hugfast við næsta áhættumat að það þarf lítið til þess að æra óstöðugan.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,464